अन्नाशिवाय माणूस राहू शकतो पण पाणी अत्यंत आवश्यक आहे. पाणी पिण्यास योग्य आहे का ? हे तपासून पाहणे गरजेचे आहे. कारण सर्वसामान्यपणे शुध्द पाणी मिळणे अशक्यप्राय गोष्ट आहे. अर्थात अतिशुध्द पाणी मिळालेच तरी ते पिण्यायोग्य नसते. कारण शरीरास थोडेसे क्षार असणारे पाणी आवश्यक असतेच. शक्यतो पिण्यायोग्य पाण्याचा सामू सातच्या जवळपास असणे योग्य आहे. अन्यथा ते पाणी पिण्यास वापरु नये. पिण्याच्या पाण्यात कार्बोनेट, क्लोराईड, फॉस्फेट, बायकार्बोनेट, सल्फेट, नायट्रेट हे क्षार असतील तर त्याचा मानवी व जनावरांच्या किडणीवर जलद परिणाम होतो. पाणी जड असल्यास त्यामधे कॅल्शियम व मॅग्नेशियमचे प्रमाण जास्त असते ते कमी करून पाण्यास हलके करावे. दरवर्षी एकरी चार टन क्षारांचा भरणा आपण निरनिराळया माध्यमातून करतो आहोत. त्यामुळे प्रदूषित पाण्याचे संकट वाढतच आहे व स्वच्छ पाण्याचे साठे प्रदूषित होत आहेत. त्यासाठी वेळीच जागृती झाली पाहिजे अन्यथा पाण्यासाठी दाही दिशा फिरावे लागेल.